وەلاتێ سێداری

وەلاتێ سێداری

نڤیسین:جاسم سەبری 

 بێکو ئێک ئەگەرێ زیندانیکرنا من بومن بێژت ، ئەو روژا دەهێ بـوو ئەز دزینداڤێ ڤە ، ژنیشکەکێ ڤە من دیت دوو پولیس هاتن و گازی من کرن ، هەرئێک ژوان دەستەکێ من گرت و ئەز ژوێ ژورا زیندانێ دەرئێخستم .

 زیندانیان گوتە من خوزیکێن تـە، تو دێ هێیە ئازادکرن ، پاشان بەرەڤ دەرگەهێ مەزن یێ زیندانێ برم ، دویڤدا ئەز سواری ترومبێلەکا پولیسان کرم ، ئێکسەر گیان ب سەرمندا هات، و من ددلێ خوەدا گوت: ئەڤ جارە ژی ئەز ئازاد بووم هەتا جارەکا دیتر خودێ کەریمە ، هێشتا ئاسنێ کەلەبچێ ژبەر پلا سارمایا دژورا دزیندانێ ڤە وەسا تەزی یە تبلێن من یێ ژبەر دلەرزن ، و ژبەر تڕسێ خـوهــ یا ب ئەنیا مندا دهێت خوار، باردوخەکێ وەسایە هەمی هەستێن من تێکەلی ئێک بوینە ، چوتشتان ژ چارەنڤیسێ خـوە نوزانم لەوا شەڕێ گرنژین و کسگریوکێ گەوریامن یا ئاسێ کری ، ل ترافیکێ ڕاوەستیاین من پسیار ژ پولیسێ ل تەنیشت خوە کر بەرێز ئەگەر هوین دێ من گەهینن مال، ئەم شاش یێ دچن کولانا مــە ل رەخێ دی یێ باژێری یە و ئەڤ جادا ئەم تێدا دچیتە بازاری ، ئەوی پولیسی ب گرنژین ڤە گۆتە من: " وەلات هەمی مالا مروڤی یە  خو بێدەنگ بکە ".

 پشتی چەند خولەکان ئەم گەهشتین نیڤا بازاری من دیت خەلک د بازنەکا بەرفرەهـ دا هاتیە کوم کرن ، دەما چاڤێن من بخلفا سێدارێ کەتین تەزینکێ لەشێ من خاف کر ، چوکێن من وەسا لەرزین ئێدی من کونترولا لڤینێن خوە ژدەست دا و من هەست ب لەشێ خوە نەکر، ئەز ژ ترومبێلێ ئینام خوار و بسەر دەپێ سێدارێ ئێخستم ، هندەکا دگوت مولحدە و هندەکا دگوت خو فروشە و هندەکا خەبەر دگوتن و هندەکا ژی دگوتن هێشتا گەنجە مخابنە ، دەمێ خلفا سێدارێ ئێخستی ستوێ من ، پولیسەک ژوان داخویانیەک خواند و گوت: ئەڤ کەسە ب تومەتا پەیوەندی کرنێ دگەل گروپەکێ تێروریستی یێ دژی دەستهەلاتێ و بازرگانیکرنێ ب مادێن بێهوشکەر هاتیە دەستەسەرکرن و ب سزایێ سێدارێ ل دادگەهێ هاتیە سزادان ، لەوا نوکە وەکی دادگەهێ بڕیاردای دێ سزایێ سێدارێ لسەر جێبەجێ کەین ، لوی دەمی هاتە بیرامن کاچەند شاشیەکا مەزنە دەمێ تو ل قوتابخانێ بێژی ماموستایێ جوگرافیێ ئەڤ باژێرێ ئەم تێدا دژین رژێمێ یێ داگیرکری دکەڤندا باژێرەکێ کوردی یە ، پولیسەکێ داخازا دۆماهیک ئاخفتن ژمن کر و گوت: تەدەمەکێ کورت هەیە دۆماهیک گوتنا خـوە بێژە ژبەری تە سێدارە بدەین ، من ژی بدەنگەکێ بلند گازی کر و گۆت: وەلات هەمی مالا مرۆڤی یە ددەمەکێ دا دوژمنێ مرۆڤی لسەر نەژیت!