ژ ئاسمانی ھەتا ئەردی
- دخوازم کوێلە ڤێ گوتارێ نەخوینن
ھەلکەت ئدریس عابد
ھەردەما ئەم دان ب ھەبونا خوەدایەکێ غەیبی بدن، وی دەمی بێ حەمد ئەم کوێلەیەکێ واقعی دروست دکن،ژبەرکو ھەبونا ھەرخوەدایەکێ ھەبونا کوێلان دخوازت، مروڤ کو چ بونەوەرەکێ ئازادە, چێکرنا وی ئازادیا وی دخوازت، سەدەم چ بن ژبو دروست بونا خوەدێ لێ ھەبونا خوەدێ خوە ئەگەر چێکەرێ وی ژی بت کوێلایەتی ل سەر سەپاندیە، ئەمانوئێل کانت دبێژت : ( ھەتا کو ئەم باوەریێ ب خوەدێ نەئینن ئەم نەشێن بەختەوەر بژین) ل گوری بوچونا کانت باوەری ب خوەدێ بون د چارچوڤەکێ ئەخلاقی دا یە، پاشان گرێدایی بەختەوەریا مروڤانە، ئا نھا ئەو پرسیار دروست دبت، چەوان بەختەوەری و کوێلایەتی د مالەکێ دا بزەوجن، دبت بەرسڤ ئەو بت یا جان بول سارتەر دشانوگەریا خوە ( مێش) دا بەرسڤ دایی. د چیروکا ڤێ شانویێ دا خوەدێ و بەندەیێ خوە دکەڤنە ھەمبەر ھەڤ و دیالوکێ دکن خوەدێ دبێژتە بەندەیێ خوە. ئەز خوەدێ مە و من تو یێ چێکری. بەندەیێ وی وەسان بەرسڤ ددە
- راستە تو خوەدەیێ و تە ئەز چێکریمە، لێ د چێکرنێ دە تە ئەز ئازاد چێکرم، ھوسا ھاتە وێ باوەریێ نە ئەز مام کوێلە و نەژی تو مایی خوەدێ,
ئەز دگەھمە وێ باوەریێ کو مروڤ چەند ئازاد ببت، دێ ھەر ھندەک حەزا کوێلایەتێ دناڤ رھێن خوینا وی دە مینت، باوەردکم ئەڤە ژ بەر ھندێ بت کو مروڤ نەشیایە ببتە ھێزا ھەری مەزن د گەردونی دا، ھەبونا ھێزەکا مەزنتر ژ وی وەکو ھێزا خوەزایێ دبتە سەدەمێ رادەست بونا وی بەرامبەر وێ ھێزێ د ئەنجام دە کوێلەبونا وی دھێتە ھەبونێ، یان ژی دبت سەدەمێ نەبونا چ بەرسڤا بو پرسیارێن وی ئەو جارنا بویە کوێلە. وەکو پرسا ژیان و مرنێ، ئا نھا ئەز دگەھمە وێ باوەریێ کو ب تنێ مروڤێ باوەری ب زیندی بونێ ھەی یێ کو باوەر ژ مرنێ نەکت و ژ مرنێ نەترست دکارت خوە ژ کوێلەبونێ رزگار بکت،دوو چیروکێن میتولوژی یێن ژ ھەڤ جودا دوو بوچونێن جودا و ھەڤدژ دئینتە ھەبونێ، یەک چیروکا سلێمان پێغەمبەر و دوو ئەفسانەیا چینی یا ب ناڤێ زەلامێ مەیمینکا، د چیروکا سلێمان پێغەمبەر دە کو ھەمی ئەجنە و گیاندار بو وی دکەڤنە کاری، وەکو کوێله ب واتەیەکا ھزری و مەتریالی بو بریارێن وی کاردکن کاڤرا دبنە سەرێ چیایی. بێی کو کەس پرسیارێ بکت کا چما ھەبونا مە بجه ئینانا بریارێن ڤی کەسی دخوازت، کو ئەڤ برسیار دەست پێکا ھەر شورەشەکێ نە بو ب داوی ئینانا خوەدایەکێ وەھمی و کوێلەیەکێ واقعی، ھەتا کو سلێمان پێغەمبەر دمرت ژی ئەو ئەجنە و گیاندار ل سەر کوێلەبونا خوە بەردەوام دبن ژبەرکو ب مرنا وی نزانن، وەکو د چیروکێ داھاتی سلێمان پێغەمبەر پشتی مرنێ ژ پێرڤە دمینت و ل سەر کوپالێ خوە خوە رادگرت، ھەتا کو گوپالێ وی دکەڤتە د رێکا مێریان دا، و مێری کوپالێ وی کون دکن دا رێکا دەرباز بونا خوە دروست بکن. ھوسا کوپال دشکێت و مرنا سلێمان پێغەمبەر دھێتە ھەبونێ و د ئەنجامدا کوێلەبونا ئەجنا و گیاندارا ب داوی دھێت، جارنا ھەوجەیە مروڤی ئیرادا وان مێریان ھەبت بو راگەھاندنا خوەدایەکێ کو مرن بو وی ھەیی، کا چەوان مێریان مرنا سلێمان راگەھاند خروشوف مرنا ستالین راگەھاند، ئەھا وەسان دڤێت ئەم مرنا وان خوەدێ یا ب راگەھینن یێن کو مرن ھەی ڤێجا چ بەری مرنا وان یان پشتی مرنا وان،دچیروکا سلێمان پێغەمبەر دە ئەز دگەھمە وێ باوەریێ کو ئەجنە ژ کوێلەبونێ نەشیان قورتال ببن ژبەرکو ھەبونا خوە ب کوێلەبونێ ناساند، ئەو نەشیان د بوھا و واتەیا ئازادیێ بگەھن، دیسان نەشیان وێ بێژن یا ئەحمەدێ خانی د داستانا مەم و زین دا گوتی ( ئەز دێ چمە دەف میرێ میران، ئەو میرێ مرن ھەبت ئەو نە چ میرە ) ھەر چەند مەم ڤێ گوتنێ دبیًژن بەری کو میر بمرت، دیسان مەمو بەری میری دمرت، لێ مەم ئازادیا خوە بەری مرنا خوە رادگەھینت ، ھەڤدژی ئەجنەیێن سلێمان پێغەمبەر کو ئازادیا خوە پشتی مرنا سلێمان پێغەمبەر رادگەھینن، چیروکا دووێ یا چینی ( ئەفسانەیا زەلامێ مەیمینکا) دا، کو نێزیکی چیروکا سلێمان پێغەمبەرە. لێ ئەنجام ژ ھەڤ جودانە، د ڤێ چیروکێ دە زەلامەک کومەکا مەیمینکا خوەدان دکن، و وەکو کوێلان کاردکن ل چیایەکێ ھەر وەکو ئەجنەین سلێمان پێغەمبەر، بەرا پێ ددتە کێشان، ئەڤ مەیمینک وەک خوەدێ ل ڤی زەلامی دنێرن، ھەتا کو روژەک مەیمینکا ژ ھەمیا بچوکتر برسیارەکا پەنجەشێری دکت و دبێژت: ما ئەڤ چیایە یێ ڤی زەلامی یە، ئەڤ پرسیارە دگەھتە وی ئەنجامی ھەتا روژەکێ ھەمی مەیمینک خوارنا زەلامی دبن و بەرەف کوپیتکا چیایی دچن. و دئەنجام دا زەلام ژ برسا دمرت و مەیمینک ئازاد دبن، ھەوجەیە جارنا بەرامبەر ھەمی دەستھەلاتێن ل دەردورا مە ئەم پرسیارا وێ مەیمینکا بچوک ژ خوە بکن ( ئەڤ چیایە یێ ڤی زەلامی یە، ئەڤ وەلاتە یێ ڤی سەروکی یە، ئەڤ باژێرە یێ ڤێ عەشیرێ یە) یان دڤێت وەکو مەیمینکا بن خوە ژ کوێلەبونێ رزگار بکن، یان ژی وەکو ئەجنەیا دێ ھند کوێلە مینن ھەتا ژ مرنا پێغەمبەر و سەروک و خوەدیێن خوەژی باوەرنەکن.
ليست هناك تعليقات:
إرسال تعليق