ژنا کورد خودان سەر و چاڤ و جەستەیێ خو نینە

ژنا کورد خودان سەر و چاڤ و جەستەیێ خو نینە 

نڤیسین : هوزان مەحمود 

کرمانجی کرن :زانا واحد

مەبەستا من ئەوە بێژم ژن د ڤی کومەلگەهی دا دوو جار خودانێن خو نینن ، جارا ئێکەمین یێن زەلامێن دناڤ خێزانا خو دانە ،ڤێجا چ ئەڤ زەلامە چ هەڤژین یان باب یان برابیت ،خو یا کریە خودانێ پاقژیی و نە پاقژیا ڤێ ژنێ .یا دووێ خودانەکێ دی یێ ل جەستەیێ وان پەیدابوویی ، کو کومپانیێن ریکلام و جوانکاریێ و نەشتەرگەریانن ، ئەڤی خودانی دڤێت ژن ل دویڤ شێوازێ وی روخسار و جەستەیێ خو فورمات بکەت ، بێگومان ئەڤێ چەندێ پارەکێ زور دڤێت هەروەسا ئازارەکا زور و زیانێن تەندروستی ژی یێن زور .

ئەڤجارە ئەوا ل کوردستانێ مەندەهوش کریم ، شێوازێ خو گوهورینا کچ و ژنان بوو گوهورینا شێوازێ بری و دەم و چاڤ و نەشتەرگەری و جلوبەرگێن وان بوو ، کو ئەڤە هەمی ئاماژەیە ژبو ئامادەییا کەلتورەکێ (پورنویی)و سێکسی د بازاری دا ، تەنانەت ئەو پێلاڤێن من د پێن هندەک ژنان دیتین لڤێرە ل ئەوروپا بتنێ ژنێن لەشفروش ل سەر جادان و (پورن ستار)ل پێن خو دکەن 

یا ژ ڤێ سەیرتر ئەوە هندەک ژ وان ژنێن ب ناڤێ رێکخراو و روژنامەنڤیس یێن توشی ئەڤی کەلتوری بووین ، خو بڤی رەنگی یا گوهارتی و نەشتەرگەری یێن کرین و هەم ئەو گوڤارێن ژنان ژی پێشڤەبرنا ڤی کەلتورێ (پورنوگرافی) دکەن و ل دەف وان پێشکەفتن و ئازادی یە .

بەلێ ئەڤ هەمی جورێن جوانکاری و جلوبەرگان ، د راستیێ دا دەرئەنجامێ بەرخور(مستهلک)ی و بێ بهاکرنا ژنێ یە د هەمی بواران دا.

 خوزی ژنێن د رێکخراوەیان دا دماوەیێ ڤان دوو سالان دا چ نەکربا و بتنێ کارێ وان هەتکبرنا ڤان خەستەخانێن تایبەت یێن نەشتەرگەریێن جوانکاری و بوتوکس و کولتورێ پورن و سڤکاتی کرنێ ب ژنێ  بان . خوزی دوو جاران ل بەرامبەر هندەک کەنالان ،کو گرنگیێ ب ڤی کولتوری ددەن خوپێشاندان کربان ، خوزی چەند سمینار و دیبەیت ل سەر ڤێ کێشێ رێکئێخستبان ،ب راستی ئەز نزانم ئەو مژویلی چنە؟

ل لایەکی ژنێن کوردستانێ هەمی هزرا وان یا بویە بەرخوری و نشتەرگەری ژبو هندێ رانێن وان وەکی یێن "کیم کارداشیان" لێ بهێن ، کو ئەڤەژی خو کویلە کرنا سکسیە ژ بو زەلامان و پەرەپێدانا کولتورێ کویلەکرنا ژنانە ، و ل لایەکێ دی داخوازا ئازادییا ژنان دکەن ! هەوە ئاگەه ژ خو نینە ، چەوان هوین دشێن داخوازا ئازادیێ بکەن ؟ و هەوە ئێک شروڤەکرن و ڤەکولین ژی نینە ژبو ڤێ کێشا مەزن یا ل بەرامبەر کوردستانێ ، ئەز نزانم چەوان هین داخوازا ئازادیێ ب وان پێلاڤێن چمک درێژێن کویلەیان دکەن ؟

ئازادی د بوتوکس و پێلاڤێن چمک بلند دا نینە ، ئازادی یا د ئامادەبوونا ژنێ دا د ناڤ رویدانان دا ، ئازادی ئەوە تو شەری بکەیی دژی ئەڤێ هەمی پاشڤەمانێ ، نە تو ببیە پارچەک ژ ڤی نەریتێ کویلەیێ ، ئازادی یا دناڤ گرفتێن راستەقینی یێن ژنێ دا نە دناڤ پورنوگرافیێ دا کو کو تو هەست پێ بکەیی ئەو ئازادی یە ...