ب گوتنێن خوش مروڤان بکە خواندەڤان

ب گوتنێن خوش مروڤان بکە خواندەڤان

شاڵاو حەبیبە

بەشی ئێکێ

■ئێک: تبلێن خو ژ بو ڤەدانا لاپەرێن پەرتوکێ بکاربینە نە ژ بو هەرەشە کرنێ.

■دوو: ئەگەر خو ژبو هندێ ژی بیت دا کو خەوا تەبهێت، کێشە نینە ل جهێ حەبێن ڤالیوم تو دشێی کورتە چیروکەکا چیخوفی بخوینی یان یێن یاسوبەر کاواباتە یی، هندەک ژوان هند دکورتن ب پشت راستی ڤە دێ ب دوماهیک ئینی و د نیڤا چیروکێ دا تو د خەو ناچی.

 ■سێ: نورمالە ل کافیتریا نارگیلەیێ ب کێشی، بەلێ دەما د چیە مال ژی نەچە جگاران بکێشە. بەلێ تو دشێی بخوینی و دگەل خواندنێ جار جاران جگاران بکێشی یان ژی جگاران بکێشی و جارجاران بچیە د سایتێ بالندە دا و چەند شعرەکان بخوینی، بەلێ چونکی سایت یێ شالاو حەبیبە یی و هەڤالێن وی یە لێ تانها چ شعرێن وی تێدا نینن لێ یێ دودل نەبە شعرێن جوان یێن تێدا .

 ■ چوار: من یا گوهـ لێ بویی هەر پەرتوکەکا تو دکەیە د ناڤ دەستێن خودا خەو تە دگریت، ما چ کێشە یە بنڤە و دەما تو ژ خەو هشیار بویی بخوینە ، ما ژ خو تو قەت هشیار نابی؟

■پێنج: یێ نیگەران نەبە ژ هندێ دەما تو دخوینی تو دەست بکەیە خو، هەمی مروڤ وەدکەن، بەلێ باشترە پتر دەست بو کتێبێ ببەیی.

■شەش: وەکی ئابلوومووفی نەبە، کو دوو لاپەرێن کتێبەکێ دخوینیت و ل سەر سەرێ خو ددانیت تا توز بکەڤیتە سەر، و پشتی چەند سالەکان جارەکا دی دەست بکەیێ ڤە ژ بوخواندنا دوو لاپەرێن دی، هەر چ نەبیت تو جار جار وێ توزێ ل سەر راکە بەلێ پێدڤی ناکەت کلینسێن تەر ب کاربینی.

■حەفت: ئەگەر تو ل کافێ کتێبەکێ بویی و شەڤەکی ژ شەڤان یان روژان تە بریار دا کوکتێلەکا شەربەتێ ڤەنەخویی، تو دشێی ل جهێ وێ پەرتوکەکێ بکری، چونکە هەر دەما تەدڤێت ئەو پەرتوک یا فرێشە.

■هەشت: ئەگەر مال گەلەک گوتە تە کو تە هەر مژویلی خواندنا پەرتوکانی، بێگومان تو نیگەران نابی چونکە تو دزانی کو تە هەر یێ مژویلی موبایلێ یی، لێ هەر چنەبیت ئەگەر تە شەڤەکێ نێت نەبوو ب لەز ئێک دوو چیروکێن جوان بخوینە ، بو نموونە ئەڤێن چێخۆفی یان یاسوونەر کاواباتە یی ، ببورە ژی کو ئەز نمونێن زێدەتر نائینم چونکە گەلەک ب زەحمەت تە نێت نامینیت.

■نەهـ: ئەگەر تو د قیتارێ دا بوویی و تە ڤیا سەحکەیە دیمەنێن ژ دەرڤە، جار جاران ژی سەحکە دیمەنێن ناڤدا یێن پەرتوکەکێ چونکە گەلەک جاران دیمەنێن ژ دەرڤە د قیتارێ دا بتنێ دفلمان دا د جوانن ژ بەر هندێ د قیتارێ دا کتێبێ بخوینە و دفلمان دا سەحکە دیمەنێن دەرڤە.

■دەهـ: ئەگەر ب جددی تو هزر دکەیی خواندنا کتێبان چ مفا تێدا نینە گوتارین "مفایێ خواندنا کتێبان" بخوینە وەکی دوماهیک پێکول د ژیانا تەدا ل سەر ڤی بواری.

■یازدە: چ بیانو (هێجەت) ژ بو نە خواندنا کتێبان نینن ، بەلێ هەر ئەو بیانو (هێجەت) ژبو تەمبەلیا تەنە، ئانکو کەیسی تە چ گرێدان ب خواندنا کتێبان ڤە نینە، خەتایێن منن ئەز بەحسا کتێبان دگەل تە دکەم ، چونکە خو تەمبەل ژی دشێن روژانە چیروکەکا چیخوفی بخوینن.

■دوازدە: ئێک ژ کێشێن کتێب خواندنێ ئەوە کو خەلک مروڤی ب کەر دزانیت، بەلێ مادەم تو باش د خوینی، چ کێشە نینن، مە ب کەر بزانە.

■سێزدە: ئەگەر جارجار کتێبان د خوینی، جارجاران بەحسا کتێبان بکە بەلێ ئەگەر حەز دکەیی بەردەوام ل سەر کتێبان باخڤی ئانکو تو یێ نەچاری بەردەوام بخوینی و ئەگەر تو نەشێی گەلەک بخوینی، ئەوێ ژی چارەسەریا خو یا هەیی، د سالەکێ دا ل جهێ تو هزار و ئێک... بەرهەمێن ڤی و یێ دی بخوینی، دوو کتێبێن باش بخوینە یێن رێژا کحولا وان بلند. مخابن رێژا کحولێ ل سەر کتێبان نەنڤیسایە، ئەز پێشنیار دکەم بنڤیسن.

■چواردە: کتێبخانە دیمەنێ مالا مروڤی جوان دکەت، ئێ کەواتە ب خواندنا کتێبا دێ دیمەنێ تەژی جوانتر لێ هێت ، تا ڤێرە گوتنا من گەلەک یا سادە بوو؟ باشە. من چەند هەڤالەکێن هەیین گەلەک باش دخوینن یێ ل بەر چوڤێن من بویینە کەیت وینسێلت.

■پازدە: نە بێژە کتێبێ من دەم نینە، بێژە دەمی من کتێب یا هەیی

■شازدە: خەلک یێ هەیی مروڤ کوژە، د کەنە د زیندانێ ڤە، بوخو ک وێرێ کتێبان دخوینیت، ئانکو دڤیت وەلتەبکەین تا کتێبان بخوینی؟

■حەڤدە: رەنگە ئەڤە پازدە سال پترە بابێ من بەردەوام پرسیار دکەت ئەڤە چیە بەردەوان تو کتێبان بو خو دخوینی پیچەکێ بومن ژی بخوینە دا بزانم ئەو چییە، دوماهیک جار دەما ئەڤ پرسیارە کری کا ئەز ل کیڤە بووم من ژی بو چەندەک ژێ خواند ئێکسەر گوتی: ئەلا ئەڤ تشتێن خوش تێدا نە لەو تو هەر کتێبان دخوینی. پاشی رابوو و چوو ئێکسەر بەرزەبوو.