چاڤێن وی هه‌می تشتێن دهۆلێ ڤه كۆنترول دكرن و هزرێن وی بژاله بووبوون، ئه‌ڤ سمینارا هه‌ر وه‌كو بۆ گه‌له‌ك كه‌سێن وه‌ك وی دهۆلێ ڤه چ پله و پۆستێن حزبی دده‌ستی دانه و ل سه‌ر خاترا سمینارا سه‌یدایی ئاماده‌بوین، نه مزگینییا ژیاره‌كا خوه‌ش بوون و نه‌ژی ئایندێ زارۆكێن وی گه‌ش دكرن! بۆ چه‌ندین جاران پێن خوه ل سه‌ر ئێك دقولپاندن و ب روونشتنێ ڤه بێزار بووبوو و چاڤێن وی وه‌كی راداری هۆل كونترول دكر؛ تشتێ ئه‌و ژ خه‌یالێ ڤه‌گه‌راندییه ناڤ هۆلێ ڤه، رۆناهییا بلاجوكتۆرێن كامیره‌یێن میدیاكاران بوو و نه‌شییا كۆنترولێ ل سه‌ر خوه بكه‌ت و ده‌نگێ بێهنشكا وی سمینار ژ بیرا هه‌مییان بر و چاڤێن وی نقیان و پرچك ژ ده‌ڤی په‌شییان؛ ده‌ما چاڤێن وی ژ سه‌ر ئێك رابوین و ب سه‌ر خوه ڤه هاتی، چه‌ندێ دهۆلێ ڤه دروونشتی و ئه‌ڤێن ل پشت كامیرا و خوه سه‌یدایێ سمینار ژی پێش كێش دكر، ل وی زڤرین؛ ب تنێ ئه‌ڤێ ل به‌ر سینگا وی نه‌بیت، ده‌ستێ وی ب سه‌رێ وی ڤه بوو و دناڤ تلێن ده‌ستێ وی دا، كلینسه‌كێ سپی دكر و ئه‌و چپك پاقژدكرن. پترییا ئاماده‌بویێن دهۆلێ ڤه وه‌ك ئه‌ڤێ ل به‌ر سینگا وی، پرچا سه‌رێ وان چ تێرا نه‌مایه یان ب نیڤی بوویه و هنده‌كان ب تنێ چه‌ند داڤه‌كێن مییان دسه‌ری را زیق دكه‌ن، ئه‌و ژی یێن ب (قه‌ترێ) ره‌شكرین و نه ئێخستینه به‌ر مه‌قه‌سا سه‌رتراشی، دا هنده‌كێ ژوێ حۆچاتیێ ڤه‌شێرن؛ سه‌ر حۆچی هه‌ر وه‌كو خه‌لك ڤان كه‌سان پێناسه‌دكه‌ن، ره‌وشه‌نبیر/ ئاقلمه‌ند/ سیاسیزان و كار به‌ده‌ستن و پترییا جاران خه‌لك رێزێ ل وان دگریت و خو ل دیوانان ژی خه‌لك جهی بۆ ڤالا دكه‌ت و دبیته سه‌یدا سه‌یدایا وان دگه‌ل. سه‌رێ خوه ب نك وی ڤه بر و ده‌ستێ خوه ل ملێ وی دا و داخوازا لیبَورینێ ژێكر، گۆتێ: “چنینه ئاسایی یه ژبیر بكه”، ئه‌ڤ چه‌ند په‌یڤه ژ ده‌ڤێ وی په‌شین بێی ل دۆر خوه ژی بزڤریت. هه‌ر چه‌نده ئه‌و گوتن به‌س بون كو بێهنشكا وی تشته‌كێ نورمال بو، لێ بێهنا وی نه‌هات، ژبه‌ركو ئه‌وی سه‌روچاڤێن وی نه‌دیتن و هزركر، نه ڤیانه‌ك د راستا وی دا یا هه‌لگرتی و حه‌زنه‌كرییه ل سه‌روچاڤێن وی بزڤریت.
سمینار به‌ره‌ڤ دوماهیێ هات و ده‌رێ هۆلێ ڤه‌بوو و هندا ده‌ست خۆشی ل پێشكێشكه‌رێ سمینارێ دكرن و هندا قه‌ستا ده‌رڤه‌ی هولێ دكرن، لێ ئه‌و دگێژه‌ڤانكه‌كا دی دا بوو و دڤێت داخوازا لێبورینێ بكه‌ت، لێبورینه‌كا ژ هه‌ژی وێ ره‌فتارا وی یا نه جوان، یا ژ نشكه‌كێ ڤه ل ده‌م و جهێن نه گونجای؛ ل به‌ر زڤری و خوه بۆ دا ناسكرن، هه‌ر چه‌نده وی سه‌روچاڤێن وی نه‌دیتبوون و دڤییا ژێ بزانیت كا وی چ ژێ دڤێت، به‌لێ وی ب گومانا وی زانی و ئێكسه‌ر گوتێ؛ ئه‌ز خودانێ بێهنشكێ مه و ئه‌ز داخوازا لێبورینێ دكه‌م، هه‌ر چه‌ند تشته‌كێ نه ب ده‌ستێ من بوو؟! لێ وه‌ك جارا دی لێ ڤه‌گه‌راند و گوتێ: ئاسایی یه و من یا ژبیركری. هه‌ر بێهنا وی نه‌هات و ڤییا ڤێ بێهه‌تكیێ ب لێبورینه‌كا ژ هه‌ژیتر، هه‌ژی سه‌رێ وی یێ حۆچ بیت، ڤێجارێ ژی قه‌ستا به‌رسینگا وی كر، كو ئه‌و یێ مژوولی ئاخفتنێ بوو دگه‌ل دوو كه‌سێن دی و سه‌رێن وان هه‌ردوویان ژی وه‌ك یێ وی د حۆچ بوون، گۆتێ: ببۆرن بۆ برینا دان و ستاندنا هه‌وه، ئاخفتنا خو ئاراسته‌ی وی ب تنێ كر و گۆتێ: ئه‌ز هه‌ست دكه‌م كرێتییا من دهۆلێ ڤه تو گه‌له‌ك یێ بێزاركری و نزانم چاوان لێبوریینا خوه بۆ ته ده‌رببرم؟ هه‌ر چه‌نده ئه‌ڤ ره‌فتاره ئه‌گه‌ر بۆ جارا ئێكێ با دا تشته‌كێ ئاسایی بیت، لێ بێهنا وی هاته سه‌رێ دفنا وی و گۆتێ: ژ دۆرێن من دویر كه‌ڤه و ئه‌ز جاره‌كا دی ته ل پێش چاڤێن خوه نه‌بینم!. لێحه‌یتاندنا وی یا ڤێجارێ ژ قامێ زێده‌تر بو و هه‌ست ب شه‌رمه‌كا مه‌زنتر كر، ل دۆر خوه زڤری كا چاڤێ چه‌ند كه‌سان ل وی بوو ده‌ما هاتیه پاشڤه برن؛ ئه‌و دووماهی جار بوو قه‌ستا ڤێ هۆلێ بكه‌ت، نه ب تنێ ئه‌ڤه ژی، بریار دا، هه‌ر كه‌سێ سه‌رێ وی حۆچ بیت، خوه ژێ دویر بكه‌ت و چ دی قه‌ستا سمیناران و جهێن ژڤی ره‌نگی نه‌كه‌ت؛ ده‌ما هه‌ست ب مه‌زنبوونا ته‌مه‌نێ خوه كری و دیتی پرچا وی یا دوه‌ریت و دێ سه‌رێ وی به‌ره‌ف حۆچبوونێ ڤه چیت، به‌ره‌ف پیشانگه‌ها فروتنا ترومبێلا ڤه‌چوو و پارێن به‌رامبه‌ری ترومبێلا خوه وه‌رگرتین، ل چاندنا پرچه‌كا نوی مه‌زاختن، ب تنێ دا ژ كابووسا حۆچاتیێ نزیك نه‌بیت.
عبدالرحمن بامه‌رنی
تێبینی: دكوڤارا په‌یڤ ژماره 71 دا بلاڤ بوویه
ليست هناك تعليقات:
إرسال تعليق