ژوور، ئالیێ ڤەشارتی یێ سەفەر و ئەردێن دوور
دیار عەبدولعەزیز
 |
| دیارعەبدولعەزیز شاعیر و نڤیسەر |
"ھەمی کێشە و نەھامەتیێن مرۆڤان ژ وێ یەکێ دھێن، مرۆڤ نەشێت د ژوورا خوە دا بمینیت" پاسکال.
ھەلبەت کۆ مرۆڤ نەشێت ل ژوورا خوە بمینیت و بەردەوام ھزرا وی ل سەر دەرکەفتن و ژدەرڤە بیت، بێی چ رێ و دەلیڤە ھەبن بچیتە وان جھێن ئەو دخوازیت و بگەھیتە وان تشتێن وی دڤێت، دێ بیتە سەدەم د رەوشەکا نەئارام دا بژیت و پتر نێزیکی بێزاری و خەمۆکییێ بیت. تایبەت ئەو کەسێن چ پلان و ئارمانج نەبن، د مال دا و ل ژوورا خوە ژ بۆ وان بخەبتن و ھەولا بدەستڤەئینانا وان بدەن. دیسان ئەوێن نەکارین ھەڤالینیێ دگەل کەسێن دناڤ مال دا بکەن، ھەڤالینیێ دگەل خێزان، گولزار، کار و کەلوپەلێن مالێ دا بکەن، بەلکی حەز ژ وان ژی ناکەن و چ سۆز ژی ژبۆ وان کەس و تشتان نەبیت، ھۆسا ھەستێ ھاڤیبوونێ ل جەم وان کەسان پەیدا دبیت و ھەردەم خوە غەریب دبینن، یان ھزر دکەن کەسێن ل دەردۆر د وی/ێ ناگەھن! ب ڤی ئاوایی دێ کێشە بۆ مرۆڤی چێبن، تایبەت کێشەیێن دەروونی. نەھامەتی ژی ئەوە دەمێ مرۆڤ نە یێ ئارام و بەختەوەر بیت.
ب گۆتنەکا دی ب تاما دەربازکرنا ڤێ رەوشێ؛ گەرەکە ئەم ھەول بدەین مە ڤیان و ھەدار بۆ مالا خوە ب گشتی و ژوورا خوە ب تایبەتی ھەبیت، جھێ سەبر و تەناھییا مە بیت. چ ب رێیا خواندنێ بیت، یان تەماشەکرنا فلم و دراما و ڤیدیۆیان، یان خوە فێرکرنا تشتەکی یان زمانەکی ببیتە ژێدەرەك و سەدەمەك بۆ مانا مە ل ژوورا مە، گرێدانا مە ب وێ جیھانا بچووك زێدە و خورت ببیت، ئەو جیھانا ب ھەمبێزا خوە مە دحەوینیت و دپارێزیت، ئەم ژی ب دەستێن خوە یان وێ لێك ددەین و دخەملینین، یان ژی وێ تێك ددەین و دھەرمینین!
ھەلبەت ئەڤە ناھێتە وێ واتەیێ کۆ ھەما ب تەنێ ل مال بین و دەرنەکەڤین، گەریان و سەفەران ژبیر بکەین! نەخێر.. کا چاوا مانا ل مال و گرنگیدانا ب خواندن، سینەما، مووزیك، زمان و تشتان.. د ناڤ ژوورێ دا گرنگە، وەسان گەریان و لێگەریان، سەفەر و وەغەر ژی دگرنگن. لێ کا چاوا ژوور و زەمین و جیھانا ژدەرڤە، دو جھێن ژھەڤ دوورن، وەسا مانا ل مال و گەریان و سەرفەر ژی تشتێن ژ ھەڤجودا و تایبەتن. ئانکۆ ھەر تشتەك ل دەمێ خوە یێ ب بھا و گرنگە.
ھەکە ئەم ل کولیلکێن ڤێ بوھارێ بنێرین، کۆ ئیرۆ یەکەم رۆژا بوھارێ یە، دێ پتر بۆ مە خویا بیت، ھەر قۆناغەكێ جوانی، گرنگی، بھا و تایبەتییا خوە ھەیە، ئەم کولیلکێن باھیڤێ وەک میناك وەربرگرین؛ کێم کەس ھەنە ب دیمەنێ کولیلکێن باھیڤان دلخوەش و بێھنفرەھ نەبن، لێ ئەم باش دزانین جوانی و بھایێ وان کولیکان یێ د وێ یەکێ را، کولیلك ب دارا باھیڤێ ڤە بن، گەر ئەم وان بکەین، نە مفا ھەیە و نە جوانییا جاران دمینیت. لێ گەر وان بھێلین، ئەو دێ ھەر بالکێش بمینن، دێ پشتی ھەیامەکێ دی باھیڤتەرکێن دلڤەکەر دەنە مە، گەر ھەمییا نەخۆین دێ کاکلکێن خوەش و ب تام پێشکێشی مە بکەت.
ئەم ژبیر نەکەین کۆ د ڤان کاودانان دا، رەوشا مە یا نھا ب ئاشکەرایی دبێژیت: مانا ل مالا میھرەبان و ژوور خەملاندن، گرنگترە ژ سەفەر و گەریانان، بەلکی دەمەکێ دی بەروڤاژی باشتر بیت، لێ ئەو خوەشی و گرنگییە بلا بۆ وی دەمێ ھین نەھاتی بیت.
 |
| تابلویێ لەرێ نەجمەدین |
