بێ بەخت

بێ بەخت

"ئامرێ من، جەنگێ بابێ من کوشت، دایکا من کوشت، خوەشتڤیا من کوشت . خوە یەک ژ ڤا ژی سەرباز نە بوو! لەوما ئیرو ئەز بوومە سەرباز، داکو تشتێ هەری ببوها نەیێ کوشتن، وەلاتێ من گرنگە ئامرێ من"

ئامرێ من  نێرین ل رووکێ من یێ توز گرتی و پڕی خەم کر، من د چاڤێ وی دە د دیت کو خەمگین بوو ژ بەر ڕەوشا من، لێ ما چ پێ چێ دبێ! ئەو ژی وەکە منە. ئێڤاربوو ئەز و ئامرێ خوە ژ دەرڤەی چادرا مە یا ڕازانێ بوون، مە هنەکێ باسا جەنگێ دکر، هەتا کو تاری کەتی ئەردێ، لێ د ناڤبەرکەکێ دە، سەربازەک هەڤالێ مە ب دەنگەکی تژی ترس و ب هێز کرە هەوار، دبێژن دێ ل ڕۆژا قیامەتێ بوقەک بهێ لێ دان، ئەز باوەرم دێ نە وەکە دەنگێ هەڤالێ مە ئەوقاسی ب ترس بێ، گاڤا گوتی" دوژمنی ب سەر مە داگرت " ، دوژمن ژ پشتڤە هێڕش ئانی مە" جاران هنەک تشت تێنە دیتن کو مرۆڤ باوەرناکێ، ئێک ژ وان تشتان ئەو بوو دەما دوژمن ژ پشتێڤە هاتی مە، د ڤی چیایێ وەها ئاسێ دە، ئەم قەد ل وێ باوەرێ نەبوون کو تشتەک بکارێ ژ وی ئالیڤە وەرێ، ژ بەر ڤێ یەکێ ئەم هنەکی شاش مان، لێ نە دەما هزرکرنێ بوو کا دوژمن چەوا د ڤێ ڕێیا ئاسێ ڕە هاتیە. دەنگێ تەقینان هات، دەستپێکێ مە دەستپێکر، ب وێ مەرەمێ کو دوژمن نێزیک نەبێ، هەتا ڕۆژ ل مە دەرکەڤێ و ئالیکاری بگەهێ مە. شەر گەرم بوو هەر یەکی ژ ئالیێ خوەڤە شەڕ دکر، بێ کو باش بزانبن کا فیشەکێن دوژمن ژ کیژان دەرێ تێن ب تەمامی، دیار بوو کو هێزەک مەزن هاتیە ، ژ ئالیێ پشتی وەکە بارانێ فیشەک دبارین. چقاسی ب ئازارە دەما ببینی هەڤالێن تە شەهید دبن و تە چ تشت پێ چێنابێ ژ بلی تەقاندنا چەند فیشەکەکان و هەتا نکارێ ب تمامی سەرێ خوە ژی ڕابکی. مە گەلەک شەهید دان هەتا ژ نیڤێ شەڤێ بووری، هەردەر ببوو خوین و ئەرد پڕ ببوو ژ لاشێن هەڤالێن مە. ئامرێ مە ل سەر زکێ خوە، خوە خشاند هەتا نێزیکی من بووی و گۆ"شیان، ئێدی مە شیان نەمان خوە لبەر بگرن، فیشەکێن مە وەختە نەمینن، ب تنێ ئەم چار کەس ب تەڕە مانە، دڤێ هەر یەک ژ مە خوە بدێ دەرەکێ و گەلک فیشەکان پوچ نەکێ، هەما وەسان بکن کو بزانبن هێ ئەم ساخن و گەلک نێزیک نەبن هەتا سپێدە ب سەرمەدا هات" دیار بوو کو بێ هەیڤی بوویە، دەستێ وی یێ چەپێ بریندار ببوو، دیسان ل سەر زکێ خوە، خوە وێڤە خشاند و ئەم بەردەوام بوون، ئەز دبێم ب تمامی قیامەت دێ وەک وێ شەڤێ بیت.  ئێدی کەسێ ژ مە هاش یێ دی نەما، هەتا ل ناڤبەرەکێ من ل ڕەخێ خوە یێ ڕاستێ نێری، من دیت کو ئامرێ مە، ل سەر زکێ خوە مایە و بەرێ وی کەتیە من، من زانی کو ژ هەڤدە کەسان، ئەز ب تنێ مام، چونکی من ژ بوو دەمەکێ چ فیشەک نە تەقاندن، دا بزانبم کا هنەک هەڤال مانە ساخ ئان نا، لێ چ دەنگ من ژ نێزیک نە بهیزتن. دونیا بەر ب زەلال بوونێ دچوو، هەر د ناڤبەرا چەند خولەکان من فیشەکەک د تەقاند، چقاسی ب ئازارە کو توو بزانبی د ڤی شەڕی دە چ جاران ب سەر ناکەڤی و تو وێ وەری کوشتن. سپێدە هات و من ئێدی چ فیشەک نەبوون ب تەقینم، دوژمن گەلکی خوە نێزیکی من کر، دەنگەکێ گازی من کر، چ عەجێب بوو، ئەگەر بێژن خوەدێ نینە، دبێ هنەک باوەربکن کو خوەدێ نینە، لێ ئەگەر ل وێ دەرێبان و گوتبان، ئەڤ نە خوە فروشە، ب هیچ ڕەنگەکێ کەسەکێ باوەر نە د کر، ب کوردی گازی من کر و گۆ"ئەم دزانن ب تنێ مای و خوە ب دەست مەڤە بەردە، ئەمێ تە ساخ بهێلن!" گاڤا من ئەڤ دەنگ بهیست، د جیدە ئاگر ژ لاشێ من چوو، چونکی من زانی ئەڤ خوەفروشکە گەهایە ڤان بێ رومەتان. من چ پێ چینەدبوو، من بریاردا کو خوە ب دەستڤە بەردم، من دڤیا کو وی کەسێ خوەفروش ببینم، بەلکو دەرفەتەک بکەڤیێ ئەز وی بکوژم، من دەستێن خوە بلندکرن و ڕابوومە سەر خوە، ل دورا من کومبوون، دو ژ وان دەستێن من گرتن، ئەوێ خوەفروش نێزیک بوو و زەلەیەک ل ڕویێ من یێ ڕاستێ دا و گۆ"مانا تە وەسان گرنگ نینە، ئەڤجا چ کارێن شاش نەکە" من ب دەنگەگ هێڕسڤە ژێڕە گۆ"ئەی خوەفروشێ بێ ڕومەت" ب ڤێ گوتنا منڕە، تیق تیق بەردا کەنییێ، دورە چوو سەر سەرێ ئامرێ من، ب دەنگەکی ب کەنی گۆ"ئها هون وەها باشن، گوهبدن کوچکێ وەکە ڤی، دێ ڕەوشا وە ئەڤ بێ" لنگێ خوە برە پاش و ل تەنشتا ئامرێ من دا، ب دیتنا ڤی دیمەنی، ئەز وەکە دینان لێ هاتم و من خوە ژ دەستێ وا دەرانی و من کرە قێرین و هەوار و هێڕش کرە یێ خوەفروش، لێ بەریا کو بگەهمی، دەنگێ تەقینا چەند فیشەکان هات دگەل دەنگی پشتا من گەرم بوو، من هەست پێکر کو هەموو چوون د لاشێ من دە، ئەز کەتمە سەر چوکێن خوە و من خوە بەردا سەر زکێ خوە، تژی دەڤێ من خون بوو و خونا لاشێ من هەڕکی، ئەوێ خوە فروش هاتە سەر سەرێ من و بوو تیق تیقا کەنیێ وی، ئەو کەن ژ وان فیشەکان نەخوەشتر بوو و بوو ئەگەرێ زوتر ژیانا من ب داوی وەرێ.....

 دلشاد حەسەن