د ژورا چاڤەریا دکتوری وەک هەمی نەساخێن دی چاڤەرێ دکر ،سەرێ خو شور کر بو دا بێژی هزار تەنێت ئاسنی یێن ب ستویێ ویڤە گرێداین هەر دو دەستێن خو ب هەمی هێز دناڤ ئێک دگڤاشتن لێ هەر نەدشیا پێ خو یێ چەپێ ژ لڤینێ ب راوەستینیت پێ وی یێ چەپێ دا بێژی یێ لسەر جیهازەکێ ڤیبراتورێ و بەردەوام درەجفیت ، دەما سکێرتێری ناڤێ وی گازی کری راست رابو سەر پێیا، پێ خویێ چەپێ ل پێشیا خو ئێخست و بەرەف ژورا دکتوری برێ کەفت، بێ کو دەرگەهی بقوتیت ، پێ خو یێ چەپێ بژور ئێخست و دەرگەهـ ل پشت خو گرت، نە بدەستێ وی بو هەمیگاڤا بەری بشێت بریارێ بدەت پێ وی یێ چەپێ ل بەری فرمانێ ژ مێشکێ خو وەرگریت بریارا خو دا ، دا بێژی سەربخوییا پێ وی یێ چەپێ شمێژە بێ وی هاتیە دان، چو لسەر کورسیکا بەرامبەر دکتوری رینشتە خار ، پێ وی یێ جەپێ بەردەوام دلڤلڤیت ،دکتور بێ کو بەرێ خو بدەتە نەساخی هەر مژیلی ڤەدانا لاپەرێن مجەلا دەستێ خو دا بو، و بەرا پرسیار کر:
دکتور: ئێ کیرا تە دئێشیت؟
زەلامی ئاخینکەک ڤەدا
زەلام: خەمگینم، ئێدی نەشیم
دکتور بێ کو هێشتا ل سەرو چاڤێن نەساخی نێرابیت بەردەوام مژویلێ ڤەدانا لاپەرێن مجەلێ یە
دکتور: دڤێت بچییە دەف دکتورەکێ دەرون ناس ، ئەز دکتورێ گشتی مە ما تە لسەر دەروکی ژی نەدخواند بەری بژور بکەڤی، سەیدا؟
زەلام بێ کو ژ جهێ خو بلڤیت
زەلام: خەم ژی ئێشە نەساخیە.. نەساخیەکا گشتیە بو ھەمی مروڤا بێ جیاوازی....،تایبەت ئەو خەمێن دبنە ئەگەر کو هەمی دونیا بێهنا گەنی و پیساتیێ بگریت
زەلامی ئەڤ ئاخفتنە بدوماهیک ئینا و چەند جارەکا کویر بێهنا خو هەلکێشا
زەلام: ئوف چ بێهنێن گەنی ناهێنە تە؟
دکتور بێ کو بەرێ خو بدەتە نەساخی چەند جارا بێهنا خو هەلکێشا، بەلێ هەست ب چ بێهنا نەکر
زەلام: دونیا یا د بێهنا خەما دا دخەندقیت
پاشی ب چاڤێن خو ل هەمی قولاچکێن ژورێ دەست ب ڤەکولینێ کر، دا بێژی یێ هندە تشتا کەشف دکەت و دبینیت کو کەسەکێ بەری وی نەدەیتینە و بەردەوام کر:
ئاها ڤێرێ ل پشت سەرێ تە بخو لسەر وی دیوارێ لپشت تە ئەو جهێ تە وەرەقەک هەلاویستی ئەو وەرەقا تە لسەر نڤێسی........؟ ...ئاها ل هنداڤ وێ...خەم یێن ب دیواراڤە هاتینە هەلاویستن، یان ئەو تەختێ هەنێ ئەوێ لوێ قولاچکێ دا... خەم یێن لسەرهندی چیایەکێ لێهاتین ...تەژی خەمێن هشک و کیفکویی ژی یێن کەفتینە بەر پێیا... خو لسەر مێزا تەژی . ما تو وان پنیێن خەمێ نابینی لسەر جامێ مێزا تە ؟
دکتور بێ حەمدێ خو هچکێ سەدریێ خو ب جامێ مێزێ دا دینیت و دبەت ، زەلام ب استهزاء پێدکەتە کەنی
زەلام: ما خو نە پنیا چایێ یە دێ هوسا پاقژ کەی؟ هەچەکو تە بڤێت ئێشا سرتانێ ب توفک خارنێ اعلاج کەی
زەلام دەستێ خو درێژ دکەتە نیڤا سەرێ خو و ب تبلکێن خو چەند ضربە لسەرێ خو دەت
زەلام: تو ڤێ کلێسێ دبینی ..ئەڤ میراتە یا تەژی بوی ژ خەما ، پر کەلەخێن مرارێن خوزیا
دکتوری دڤیا زویتر ژ ڤی نەساخێ سەیر خو خلاس کەت لەوما بلەز لسەر وەرەقەکێ دەست ب نڤێسینێ کر
دکتور: دێ هندەک هەبکا بو تە نڤێسم یێن روژێ سێ جارا هەر جارێ نیڤا هەبکێ
زەلامی دیسا ئاخینکەک ڤەدا
زەلام: شەربەتەکا کوخکێ و دەستەکێ هەبکێن مەعیدە ژی لێ زێدە کە
دگەل ڤێ جەندێ زەلامی دەستێ خو برە دناڤ بەریکا قەمسەلێ خودا و دەمانجەک ئینا دەر و دانا سەر جێنیکا خو یا چەپێ و تەق...دەنەگک وەکی پەقینا پڤدانکێ ژێ هات بەلێ چ خوین ل وارا نە بو خو چپکەکا خوینێ ژی نە رێشتە ئەردی ، شوینا خوین و پرتێن مەژی ، پرت پرت خەم ژ سەرێ وی دوەریان ، بێهنا نانێ کیفکویی، بێهنا ئاڤێن جوکا یێن خەم و بێ زاریێ رێک لێ گرتی و ب هەیڤا پەنگی ، بێهنا ئیڤارێن بێ کەسیێ ژێ فری و ژور تەژی کر دکتور بەرەف زەلامی چو هەتا وێگاڤێ مابو راوەستیای بێ کو بزانیت دڤێت چ بکەت ، سەدریێ خو ژ بەر خوکر و لسەر وی دیمەنێ بترس دادا هێشتا ژ وی زەلامی دویر نەکەفتبو کو هەست دکر تشتەک یێ ل وارا دلڤلڤیت بەرێ خو ل زەلامی وەرگێرا و ل ئەردی نێری دیت پێ چەپێ زەلامی هێشتا یێ دلڤلڤیت بێ راوەستیان وەکی دەولەتەک سەربخو بشتی مرنا زەلامی بەردەوامی ب لڤینا خودا، بێهنا گەنی ژور تەژی کربو بێهنا خەمێن هزار سالی و دکتوری لدەف خو هزردکر بەلکی ڤی زەلامی دوەختێ خودا گەلەک( یوگا )کر بیت تا کو گەهشتیە ڤێ قوناغا تایبەت کو پێ وی بشتی مرنا وی ژی بەردەوامی بدەتە سەر ژیانا خو یوگا ئـەڤ پەیڤە بەری بیھنەکێ کەفتبو بەرچاڤین وی دناڤ مجەلا دەستێ وی دا
کەڤال سدقی
ليست هناك تعليقات:
إرسال تعليق