دا ئاڤێ شێلی نەکەین

دبیت ل خوارتر

کەڤۆکەک ئاڤێ ڤەخۆت..

یان ل هێلینەکا دوور

زەنگولیتکەک* پەرێن خوە بشۆت..

یان ل جهەکی

گۆسکەک ژێ بهێتە تژیکرن..

دا ئاڤێ شێلی نەکەین

دبیت ئەڤ ئاڤا رەهوان..

بچیتە بنێ چنارەکێ و

خەمێن دلەکی بڤەرەڤینیت..

دبیت دەستێ دەروێشەکی

نانەکا هشک پێ تەر بکەت..

ژنەکا شەنگ

هاتە بەر لێڤا چەمی

دا ئاڤێ شێلی نەکەین

تەماشە بکە سیمایێ جوانیێ

دو جاران هندی خوە لێ هات!

چ یا خۆشە ئەڤ ئاڤە..!

چەندێ زەلالە ئەڤ چەمە..!

ئەو خەلکێ ل سەر ئاڤێ 

چەند جوامێرن!

کانیێن وان بپەقن

چێلێن وان پر شیرببن

من گۆندێ وان نەدیتی یە

بێگۆمان

ل بن پەرژانێن وان

شوون پێن خوەدێ ددیارن..

تریفەیا وێرێ

تاریاتیا پەیڤان رۆهن دکەت..

هەلبەت ل وی گۆندێ ل سەری

دیوار د نزمن..

خەلکێ وێرێ دزانن

نیسانۆک چ گولە..

بێگۆمان ل وێرێ

شین

شینە..

دەمێ کو بشکۆژەک دپشکڤیت

خەلکێ وێرێ

ئاگەهـ ژێ هەیە..

ئەرێ دڤێت ئەو چ گوند بیت؟

رێیا ناڤ باغێن وێ یا تژی مۆسیقە

ئەڤە خەلکێ ل سەر وی چەمی

ژ ئاڤێ فام کری..

ئێدی ئاڤ شێلی نەکری یە

پا دا ئەم ژی

ئاڤێ شێلی نەکەین..!

ــــــــــــــــــــــــــــــــــــــــــــــــــــــــــ

 * زەنگولیتک: بالندەیەکێ بچووکە پەرێن وی د رەش و چاڤ و نکل سۆرە، ئەڤ بالندەیە ب کۆم ل چۆل و زەڤیان دژین، ل پایز و زڤستانان ل سەر رێیان دهێتە دیتن.

شعر: سوهراب سپهری.

وەرگێران: توانا ئەمین. 

 ڤەگۆهاستن بۆ کرمانجییا سەری: دیار عەبدولعەزیز.